Mintga persuna vegn inscritta mo ina giada en il register dal stadi civil. L’artitgel 15b resta resalvà.75
La documentaziun d’in eveniment dal stadi civil u d’in fatg dal stadi civil premetta che las datas actualas da las persunas pertutgadas sajan disponiblas en il register dal stadi civil; questa premissa croda tar la documentaziun da la naschientscha d’in uffant chattà (art. 10) e da la mort d’ina persuna nunenconuschenta.
Ils eveniments dal stadi civil d’ina persuna vegnan documentads en successiun cronologica.
Las unitads da datas (totalitad da las datas davart ina persuna) da las persunas ch’il register dal stadi civil cuntegna vegnan colliadas ina cun l’autra sin basa da las relaziuns da dretg da famiglia. Sche la relaziun giuridica vegn abolida, croda la colliaziun.
Sch’i vegn fatga ina documentaziun, vegnan actualisadas las datas da tut las persunas ch’èn pertutgadas da la documentaziun.