In conclus da la radunanza generala che vegn approvà d’almain dus terzs da las vuschs represchentadas sco er da la maioritad da las valurs nominalas da las aczias represchentadas, è necessari per:
midar l’intent da la societad;
reunir aczias, nun che quai dovria il consentiment da tut ils acziunaris pertutgads;
augmentar il chapital tras agen chapital, tras apports en natiralias u tras la scuntrada cun ina pretensiun, e conceder avantatgs spezials;
restrenscher u abolir il dretg da suttascripziun;
introducir in chapital cundiziunà, introducir ina marscha da chapital u stgaffir chapital da reserva tenor l’artitgel 12 da la Lescha da bancas dals 8 da november 1934565;
converter certificats da participaziun en aczias;
restrenscher la transferibilitad d’aczias al num;
introducir aczias cun dretg da votar;
midar la valuta dal chapital d’aczias;
introducir la vusch decisiva dal parsura en la radunanza generala;
fixar ina disposiziun statutara per salvar la radunanza generala a l’exteriur;
dequotar ils titels da participaziun da la societad;
spustar la sedia da la societad;
introducir in clausula da cumpromiss en ils statuts;
desister da designar in represchentant independent dal dretg da votar per salvar ina radunanza generala virtuala en societads senza aczias quotadas ad ina bursa;
dissolver la societad.566
Disposiziuns statutaras che prevesan – per tscherts conclus – maioritads pli grondas che las maioritads prescrittas da la lescha, pon vegnir introducidas, midadas u abolidas mo cun la maioritad previsa.567
Ils possessurs d’aczias al num che n’han betg approvà in conclus davart la midada da l’intent da la societad u davart l’introducziun d’aczias cun dretg da votar n’èn betg liads vi da las restricziuns statutaras da la transferibilitad da las aczias, e quai durant 6 mais suenter la publicaziun dal conclus en il Fegl uffizial svizzer da commerzi.