Il debitur ed il creditur pon contestar cunter il dretg dal terz tar l’uffizi da scussiun, sch’il dretg sa referescha ad:
ina chaussa movibla en possess exclusiv dal debitur;
ina pretensiun u in auter dretg, sch’il dretg dal debitur vi da la chaussa è pli probabel che quel dal terz;
in bain immobigliar, sch’il dretg dal terz na resulta betg dal register funsil.
L’uffizi da scussiun als fixescha in termin da 10 dis en chaussa.
Sin dumonda dal debitur u dal creditur vegn il terz envidà da preschentar ses meds da cumprova a l’uffizi da scussiun per prender invista entaifer il termin da contestaziun. L’artitgel 73 alinea 2 vala tenor il senn.
Sch’il dretg dal terz na vegn betg contestà, vala el sco renconuschì en la scussiun respectiva.
Sch’il dretg vegn contestà, fixescha l’uffizi da scussiun in termin da 20 dis per il terz, entaifer il qual el po purtar plant cunter il contestader per laschar constatar ses dretg. Sch’el na porta betg plant, na vegn il dretg betg resguardà en la scussiun respectiva.