Il mandat penal cuntegna:
la designaziun da l’autoritad disponenta;
la designaziun da la persuna inculpada;
ils fatgs che vegnan incriminads a la persuna inculpada;
ils causals penals che vegnan ademplids tras quai;
la sancziun;
la menziun – motivada curtamain – da la revocaziun d’ina sancziun u d’ina relaschada cundiziunada;
il termin per stizzar in eventual profil dal DNA;
l’obligaziun da surpigliar custs ed indemnisaziuns;
la designaziun d’objects e da valurs da facultad sequestrads che vegnan deliberads u confiscads;
il renviament a la pussaivladad da far protesta ed a las consequenzas d’ina protesta tralaschada;
il lieu e la data da l’emissiun dal mandat penal;
la suttascripziun da la persuna che emetta il mandat penal;
En la procedura da mandat penal po la procura publica decider davart pretensiuns civilas, sche quellas èn renconuschidas da la persuna inculpada u sche:
igl è pussaivel da las giuditgar senza registrar ulteriuras cumprovas; e
la valur en dispita na surpassa betg 30 000 francs.249
Il mandat penal vegn communitgà immediatamain en scrit a las persunas ed a las autoritads che han il dretg da far protesta.