L’appellaziun u l’appellaziun adesiva vala sco retratga, sche la partida che l’ha declerada:
resta absenta da la tractativa d’appellaziun a bucca senza sa perstgisar e na sa lascha er betg represchentar;
na fa betg ina inoltraziun en scrit; u
na po betg vegnir citada.
Sche la procura publica u l’accusader privat ha declerà l’appellaziun cunter la culpaivladad u cunter l’aspect penal e sche la persuna inculpada resta nunperstgisadamain absenta da la tractativa, ha lieu ina procedura contumaziala.
Sche l’accusader privat ha restrenschì sia appellaziun a l’aspect civil e sche la persuna inculpada resta nunperstgisadamain absenta da la tractativa, decida la dretgira d’appellaziun sin basa dals resultats da la tractativa principala d’emprima instanza e sin basa da las ulteriuras actas.