Sch’i vegn fatg valair in motiv da recusaziun tenor l’artitgel 56 litera a u f ubain sch’ina persuna che lavura tar in’autoritad penala s’oppona ad ina dumonda da recusaziun fatga d’ina partida sin basa da l’artitgel 56 literas b–e, decida senza ulteriura procedura da cumprova:22
la procura publica, sche la polizia è pertutgada;
l’instanza da recurs, sche la procura publica, las autoritads penalas per surpassaments u las dretgiras d’emprima instanza èn pertutgadas;
la dretgira d’appellaziun, sche l’instanza da recurs u singuls commembers da la dretgira d’appellaziun èn pertutgads;
il Tribunal penal federal, sche l’entira dretgira d’appellaziun d’in chantun è pertutgada.
La decisiun vegn prendida en scrit e sto vegnir motivada.
Fin che la decisiun n’è betg vegnida prendida, exequescha la persuna pertutgada vinavant ses uffizi.
Sche la dumonda vegn approvada, van ils custs da procedura a quint da la Confederaziun respectivamain dal chantun. Sche la dumonda vegn refusada u sch’ella è evidentamain retardada u da levsenn, van ils custs a quint da la persuna petenta.