Uschenavant ch’ina multa na po betg vegnir incassada, la transfurma il derschader en arrest, en cas da giuvenils en fermanza. La multa pervia d’ina violaziun da l’urden na po betg vegnir transfurmada.
Il derschader po excluder la transfurmaziun, sch’il sentenzià cumprova ch’el n’è – senza esser sez la culpa – betg en cas da pajar la multa. L’exclusiun da la transfurmaziun n’è dentant betg admissibla, sch’il sentenzià ha commess intenziunadamain la cuntravenziun e sch’i n’èn – il mument ch’il malfatg è vegnì commess – betg anc passads 5 onns, dapi ch’el è vegnì sentenzià pervia d’ina cuntravenziun cunter la medema lescha administrativa, premess che questa cuntravenziun n’era betg mo ina violaziun da l’urden.7
En cas d’ina transfurmaziun vegnan 30 francs quintads sco in di arrest u fermanza, ma il chasti da transfurmaziun na dastga betg durar pli ditg che 3 mais. Sch’i èn vegnidas pajadas ratas, reducescha il derschader il chasti da transfurmaziun en la proporziun tranter questas ratas e la summa da l’entira multa.
Sche la multa vegn pajada, suenter ch’ella è vegnida transfurmada, scada il chasti da transfurmaziun, uschenavant che quel n’è betg anc vegnì exequì.