Per augmentar la capacitad fisica e la sanadad da la populaziun sco er la furmaziun cumplessiva e la coesiun sociala persequitescha questa lescha las suandantas finamiras:
augmentar las activitads fisicas e sportivas sin tut ils stgalims da vegliadetgna;
augmentar la valur dal sport e da l’activitad fisica en l’educaziun ed en l’instrucziun;
stgaffir cundiziuns generalas cunvegnentas per promover il sport da prestaziun da la generaziun giuvna ed il sport d’elita;
promover cumportaments che francheschan las valurs positivas dal sport en la societad e che cumbattan cunter ils fenomens secundars nungiavischads;
impedir accidents da sport e d’activitad fisica.
La Confederaziun cuntanscha questas finamiras cun:
sustegnair e realisar programs e projects;
prender mesiras cunzunt en ils secturs da la furmaziun, dal sport da prestaziun, da la correctadad e da la segirezza en il sport sco er da la perscrutaziun.