Cun ils programs naziunals da perscrutaziun (PNP) dal Fond naziunal svizzer (FNS) duain vegnir lantschads e realisads projects da perscrutaziun ch’èn coordinads in cun l’auter e ch’èn orientads ad ina finamira cuminaivla.
Sco object dals PNP èn cunzunt adattads problems:
per la soluziun dals quals la perscrutaziun svizra po furnir in agid spezial;
per la soluziun dals quals èn necessarias contribuziuns da perscrutaziun da differentas disciplinas;
dals quals la perscrutaziun pli profunda permetta da spetgar entaifer circa 5 onns resultats ch’èn utilisabels per la pratica.
En cas excepziunals motivads po in PNP er vegnir duvrà per crear sistematicamain in potenzial da perscrutaziun supplementar en Svizra.
Tar la selecziun dals programs vegni er resguardà, sche:
ils resultats spetgads dals programs pon servir sco basa scientifica per decisiuns da la regenza e da l’administraziun;
il program po vegnir realisà en il rom d’ina collavuraziun internaziunala.