L’instrucziun da basa cumenza il pli tard 2 onns suenter la recrutaziun per la protecziun civila.30
Persunas che vegnan suttamessas a l’obligaziun da far servetsch da protecziun civila suenter ch’ellas han cumplenì 24 onns, ston cumenzar cun l’instrucziun da basa entaifer 1 onn suenter lur incorporaziun en la protecziun civila.31
Sche la persuna obligada da far servetsch da protecziun civila na po – per motivs imprevis – betg observar il termin dal cumenzament da l’instrucziun da basa, po il chantun spustar quest termin. La persuna obligada da far servetsch da protecziun civila sto dentant en mintga cas cumenzar cun l’instrucziun da basa il pli tard quel onn, ch’ella cumplenescha 30 onns.32
L’instrucziun da basa dura 10–19 dis.
En cas d’ina midada da l’incorporaziun pon las persunas obligadas da far servetsch da protecziun civila vegnir obligadas da puspè absolver ina instrucziun da basa en lur nov sectur specific. Ils chantuns decidan davart la midada da l’incorporaziun.
Sch’ina persuna fa voluntarmain servetsch da protecziun civila u sch’ella ha gia absolvì la scola da recrut, po il chantun decider, sche e tge parts da l’instrucziun da basa ch’ella sto absolver. Il Cussegl federal regla ils detagls.33
…34