Ils chantuns procuran, ch’i vegnian fixads en il plan directiv particularmain ils territoris ed ils trajects d’auas ch’èn adattads per explotar la forza idraulica e la forza dal vent sco er ils territoris adattads per implants solars ch’èn d’interess naziunal tenor l’artitgel 12 alinea 2 (art. 8b da la Lescha federala dals 22 da zercladur 197910 davart la planisaziun dal territori).11
Els includan lieus gia explotads e pon inditgar er territoris e trajects d’auas che ston da princip vegnir tegnids libers.12
Cun determinar ils territoris per implants solars e per implants eroelectrics ston ils chantuns resguardar ils interess da la protecziun da la cuntrada e dals biotops sco er ils interess dal mantegniment dal guaud e da l’agricultura, spezialmain da la protecziun da la cuntrada cultivada e da la protecziun da las culturas alternantas.13
Per implants solars ed eroelectrics d’interess naziunal tenor ils artitgels 12 alinea 2 e 13 alinea 1 ch’èn situads en tals territoris, n’èsi betg necessari da determinar in project specific en il plan directiv chantunal.14
Sche necessari procuran ils chantuns, ch’i vegnian etablids plans d’utilisaziun u ch’i vegnian adattads plans d’utilisaziun existents. Quai po er vegnir fatg en il rom d’ina procedura chantunala d’approvaziun dals plans concentrada tenor l’artitgel 14a (procedura chantunala d’approvaziun dals plans).15
Per projects tenor l’artitgel 8 alinea 2 da la Lescha dals 22 da zercladur 197916 davart la planisaziun dal territori realiseschan las autoritads cumpetentas, en cas adattads, la procedura dal plan directiv parallelamain cun la procedura dal plan d’utilisaziun u cun la procedura chantunala d’approvaziun dals plans.17