Las datas ston vegnir elavuradas en Svizra tenor il dretg svizzer.
La Posta dastga elavurar datas persunalas e datas da persunas giuridicas, sche quai è necessari per furnir ils servetschs tenor questa part e sche las datas na vegnan betg communitgadas a terzs nunautorisads.
Ella procura che:
las datas dal cuntegn e las metadatas dal sistem da distribuziun ibrid vegnian arcunadas ed elavuradas en moda logicamain separada d’auters effectivs da datas;
i vegnian duvradas proceduras da codaziun che correspundan al stadi actual da la tecnica per arcunar e per transmetter las datas;
la transmissiun da datas resguardia ils standards tecnics da l’administraziun federala pertutgant ina transmissiun segira;
tut las datas che na vegnan betg duvradas per furnir servetschs postals ordaifer il sistem da distribuziun ibrid, vegnian destruidas suenter la schliaziun d’in conto d’utilisaziun, observond ils termins legals;
il conto d’utilisaziun vegnia schlià, sche ses utilisader n’è durant pli che 2 onns betg pli s’annunzià en ses conto; la schliaziun sto vegnir annunziada.
La PostCom po fixar las pretensiuns tecnicas ed organisatoricas envers la protecziun e la segirezza da las datas. Ella controllescha regularmain, che quellas vegnian observadas.
La Posta fixescha en scrit las mesiras organisatoricas e tecnicas per impedir in’elavuraziun nunautorisada da las datas e protocollescha automaticamain l’elavuraziun da las datas.
Ella maina in sistem che tegna quint da las ristgas, per identifitgar incidents da segirezza e per tractar tals. Areguard la protecziun e la segirezza da las datas annunzia ella a la PostCom incidents che vegnan classifitgads sco relevants per la segirezza.