Il post da mediaziun examinescha la fatschenta ed intermediescha tranter las parts participadas. El po en spezial:
discutar la fatschenta cun l’emettur da programs u al transferir cas levs per als liquidar directamain;
procurar per ina scuntrada directa tranter las parts participadas;
far recumandaziuns a l’emettur da programs;
orientar las parts participadas davart las cumpetenzas, davart il dretg decisiv e davart la via giudiziala.
El n’ha betg la cumpetenza da prender decisiuns u da dar directivas.
Il post da mediaziun infurmescha en scrit las parts participadas davart ils resultats da ses scleriments e davart il gener da la liquidaziun da la reclamaziun il pli tard 40 dis suenter l’inoltraziun da la reclamaziun.
En enclegientscha vicendaivla da las parts participadas po avair lieu ina liquidaziun a bucca.
Il post da mediaziun metta a quint ils custs che derivan da la liquidaziun a l’emettur da programs suenter avair tractà la reclamaziun. Sin dumonda dal post da mediaziun u da l’emettur po l’autoritad da recurs – en il cas d’ina reclamaziun da levsenn – adossar ils custs da procedura a quella persuna che ha inoltrà la reclamaziun.