Ils ruments ston vegnir reciclads u suttamess ad ina reutilisaziun materiala, sche quai è tecnicamain pussaivel ed economicamain supportabel e contaminescha l’ambient main ferm ch’ina autra dismessa u che la producziun da novs products.
Ad ina reutilisaziun materiala tenor ils princips da l’alinea 1 ston vegnir suttamess en spezial:
metals reciclabels ch’èn cuntegnids en las restanzas dal tractament da ruments, da l’aua persa e da l’aria persa;
cumparts reciclablas ch’èn cuntegnidas en il material da stgavament e d’exchavaziun betg smerdà, che duai vegnir deponì definitivamain;
fosfor ch’è cuntegnì en la glitta da sereneras sco er en la farina d’animals e dad ossa ed en vanzadiras da spaisas;
ruments ch’èn adattads per la cumpostaziun u per la fermentaziun;
nitrogens da sereneras.
Sch’ina reutilisaziun materiala tenor las cundiziuns da l’alinea 1 n’è betg pussaivla, ston ils ruments vegnir reciclads prioritarmain en moda materiala ed energetica e lura en moda puramain energetica.
A maun dal basegn naziunal fixescha il Cussegl federal la quantitad da fosfor ch’è cuntegnida en las auas persas communalas u en la glitta da sereneras centralas e ch’è puspè d’attribuir al ciclus economic.
L’obligaziun da la reutilisaziun materiala da fosfor ch’è cuntegnì en la glitta da sereneras, vegn considerada sco ademplida, sch’il furnitur da la glitta da sereneras cumprova a l’autoritad executiva, che la quantitad da fosfor fixada dal Cussegl federal vegn puspè attribuida al ciclus economic per la quantitad da glitta da sereneras ch’el furnescha. Ils custs da manaschi e da chapital che n’èn betg cuvrids tras ils retgavs dals products, sco l’acid da fosfor, ston vegnir surpigliads dals chaschunaders da la glitta da sereneras.
Sch’i vegn cumprovà, che l’obligaziun da la reutilisaziun da fosfor ch’è cuntegnì en la glitta da sereneras en il senn da l’alinea 5 saja ademplida, po la glitta da sereneras vegnir utilisada sco combustibel substitutiv, senza stuair recuperar fosfor.
Il Cussegl federal po restrenscher l’utilisaziun da materials e da products per tscherts intents, sche quai gida a promover la vendita da products correspundents dal recicladi da ruments e sche quai è pussaivel senza perditas da qualitad essenzialas e senza custs supplementars essenzials.