L’uffizi federal po ordinar mesiras administrativas cunter persunas ch’èn obligadas da pajar taxas e contribuziuns, ma che n’adempleschan betg lur obligaziuns tenor ils artitgels 32abis–32aquinquies.
El po ordinar las suandantas mesiras administrativas:
la publicaziun dals nums u da las firmas da las persunas ch’èn obligadas da pajar taxas e contribuziuns;
in scumond d’importar lur products;
la segirada provisorica dals products al cunfin e l’ingiant dals products;
la segirada provisorica dals products al cunfin e la surdada gratuita dals products ad in’organisaziun d’utilitad publica;
la segirada provisorica dals products al cunfin e la destrucziun dals products, sch’els èn donnegiads, signifitgan in privel per la segirezza u per l’ambient u èn vegnids importads illegalmain.
Il retgav da l’ingiant tenor l’alinea 2 litera c vegn utilisà, suenter la deducziun da las spesas da l’organisaziun privata tenor l’artitgel 32abis respectivamain da l’organisaziun professiunala privata tenor l’artitgel 32ater, per finanziar la dismessa dals ruments.
L’uffizi federal po publitgar ils nums u las firmas dals gestiunaris da plattafurmas electronicas, che n’adempleschan betg lur obligaziuns tenor l’artitgel 32asexies.
Avant che ordinar las mesiras administrativas, taidla el las persunas ch’èn obligadas da pajar taxas e contribuziuns ed ils gestiunaris da plattafurmas electronicas.
Las mesiras tenor l’alinea 2 literas b ed e vegnan exequidas dal UDSC, las mesiras tenor l’alinea 2 liters a, c e d da l’uffizi federal. Per che l’uffizi federal possia exequir las mesiras tenor l’alinea 2 literas c e d, al surdat il UDSC ils products ch’èn vegnids segirads provisoricamain al cunfin.