Uschenavant che l’execuziun da questa lescha, da las disposiziuns executivas u da las disposiziuns ch’èn vegnidas decretadas sin basa da talas pretenda quai, ordineschan ils organs executivs las mesiras da controlla e las retschertgas necessarias.294
Il Cussegl federal po decretar prescripziuns per garantir in’activitad da controlla unitara, cuminaivla ed accordada sco er il barat d’infurmaziuns necessari tranter ils organs da controlla responsabels cun exequir questa lescha e las ulteriuras leschas che pertutgan l’agricultura.295
Persunas, firmas ed organisaziuns che chaschunan, engrevgeschan u impedeschan controllas tras lur cumportament illegal, èn obligadas da cuvrir ils custs che resultan tras quest cumportament.
Il Cussegl federal po surdar singulas mesiras da controlla e retschertgas als chantuns.
Per controllas che na chaschunan naginas reclamaziuns po el fixar taxas, particularmain per:
controllas fitosanitaras;
controllas da semenza e da plantas;
analisas da controlla;
controllas dals pavels.296
El po prevair che l’importader sto pajar tar l’import ina taxa per controllas spezialas che ston vegnir fatgas pervia da ristgas enconuschentas u pervia da ristgas che sa mussan da nov en connex cun tscherts meds da producziun agriculs u cun tschertas plantas.297
El po prevair autras taxas, uschenavant che la Svizra è s’obligada en in contract internaziunal d’incassar talas.298
La Confederaziun po finanziar analisas da labor che servan a controllar las disposiziuns davart ils products fitosanitars.299