La Confederaziun sustegna las meglieraziuns da structura cun contribuziuns en il rom dals credits approvads.
La contribuziun importa maximalmain 50 pertschient dals custs imputabels. Excepziunalmain po la contribuziun vegnir auzada sin maximalmain 60 pertschient dals custs imputabels.
La concessiun d’ina contribuziun federala premetta la prestaziun d’ina contribuziun adequata dal chantun, inclusiv da sias corporaziuns territorialas da dretg public, sco er ina participaziun minimala dal purtader dal project.
Per eliminar consequenzas spezialmain grevas d’eveniments da la natira extraordinaris po la Confederaziun conceder ina contribuziun supplementara da maximalmain 20 pertschient dals custs imputabels, sche er participaziuns adequatas dal chantun, da las vischnancas e da fonds da dretg public na bastan betg per finanziar las lavurs necessarias.
Il Cussegl federal fixescha l’autezza da las tariffas da contribuziun, ils custs imputabels e las excepziuns. El graduescha l’autezza da las contribuziuns tenor il grad da la dimensiun collectiva. El po fixar l’autezza da las contribuziuns en moda pauschala.
Il Cussegl federal po fixar premissas e cundiziuns per conceder las contribuziuns.