Sche la persuna inculpada vegn acquittada per part u dal tuttafatg u sche la procedura cunter ella vegn messa ad acta, ha ella il dretg:
d’ina indemnisaziun fixada tenor la tariffa d’advocats per ils custs impundids per ademplir adequatamain ses dretgs processuals; en connex cun la tariffa d’advocats na vegni betg differenzià tranter l’indemnisaziun concedida ed ils onuraris per la defensiun privata;
d’ina indemnisaziun da las perditas economicas ch’èn resultadas ad ella pervia da sia participaziun necessaria a la procedura penala;
d’ina reparaziun per violaziuns spezialmain grevas da sias relaziuns persunalas, cunzunt en cas da privaziun da la libertad.
L’autoritad penala examinescha d’uffizi il dretg. Ella po envidar la persuna inculpada da quantifitgar e da cumprovar sias pretensiuns.
Sche la persuna inculpada ha incumbensà in defensur privat cun sia defensiun, ha sulettamain il defensur il dretg d’ina indemnisaziun tenor l’alinea 1 litera a, sut la resalva da la facturaziun cun ses client. Cunter la decisiun d’indemnisaziun po il defensur prender il med legal ch’è admissibel cunter la decisiun finala.276