La protecziun dals biotops duai segirar la survivenza da la flora e da la fauna selvadia indigena, e quai en spezial ensemen cun la cumpensaziun ecologica (art. 15) e cun las disposiziuns davart la protecziun da las spezias (art. 20).
Ils biotops vegnan protegids en spezial tras:
mesiras per mantegnair u sche necessari per restabilir lur particularitads e lur diversitad biologica;
il mantegniment, la tgira e la surveglianza per segirar a lunga vista la finamira da protecziun;
mesiras da concepziun che permettan da cuntanscher la finamira da protecziun, d’eliminar donns existents e d’evitar donns futurs;
la determinaziun da zonas da plimatsch suffizientas ord vista ecologica;
l’elavuraziun d’infurmaziuns da basa scientificas.
Ils biotops vegnan designads sco degns da vegnir protegids sin basa dals suandants criteris:
ils tips da spazis da viver tenor l’agiunta 1 ch’èn caracterisads en spezial tras indicaturs;
las spezias da plantas e d’animals protegidas tenor l’artitgel 20;
ils peschs ed ils giombers periclitads tenor la legislaziun da pestga;
las spezias da plantas e d’animals periclitadas e raras che figureschan sin las Glistas cotschnas publitgadas u renconuschidas dal UFAM;
ulteriurs criteris sco ils basegns da migraziun da las spezias u la colliaziun tranter ils biotops.
Ils chantuns pon adattar las glistas tenor l’alinea 3 literas a–d a las relaziuns regiunalas.
Ils chantuns prevesan ina procedura da constataziun adequata che permetta da prevegnir ad eventuals donns vi da biotops degns da vegnir protegids sco er a violaziuns da las disposiziuns da l’artitgel 20 davart la protecziun da las spezias.
Ina intervenziun tecnica che po donnegiar biotops degns da vegnir protegids dastga vegnir permessa mo, sch’ella è indispensabla en quest lieu e sch’ella correspunda ad in basegn predominant. Per valitar ils biotops en la consideraziun dals interess n’è betg mo decisiva la dignitad da protecziun tenor l’alinea 3, mabain en spezial er ils suandants criteris:
lur impurtanza per las spezias da plantas e d’animals protegidas, periclitadas e raras;
lur funcziun da cumpensaziun ecologica;
lur impurtanza per la colliaziun tranter biotops degns da vegnir protegids;
lur particularitad biologica u lur caracter tipic.
Tgi che fa u chaschuna ina intervenziun, sto vegnir obligà da prender las meglras mesiras pussaivlas per proteger u per restabilir ils biotops ubain da prender autras mesiras da cumpensaziun adequatas.