Mintga parlamentari po inoltrar a la chombra ed a la cumissiun predeliberanta propostas concernent in object da tractativa pendent. El po dumandar la cumissiun cumpetenta d’inoltrar ina iniziativa parlamentara u ina intervenziun da la cumissiun.
In sboz per in decret po mo vegnir inoltrà en furma d’ina proposta, sche:
in sboz per in decret pendent duai vegnir dividì en plirs sbozs;
ina cuntraproposta davart la medema dumonda constituziunala duai vegnir opponida ad ina iniziativa dal pievel (art. 101).82
Propostas che pertutgan la procedura (propostas davart l’urden) ston per regla vegnir tractadas immediatamain.
Cun ina proposta davart l’urden poi vegnir pretendì da revegnir ad in conclus, uschè ditg ch’ina chombra n’ha betg terminà sia deliberaziun davart in object da tractativa.83
Ina proposta davart l’urden che pretenda da revegnir a la decisiun d’entrar en materia, è inadmissibla.84
Ina proposta davart l’urden che pretenda da repeter ina votaziun, cun la quala la chombra ha terminà sia deliberaziun d’in object da tractativa, dastga vegnir inoltrada mo directamain suenter la votaziun.85
Propostas ch’èn vegnidas refusadas d’ina maioritad da la cumissiun pon vegnir inoltradas sco propostas da minoritad.